ვაჟა-ფშაველას გამზირზე "ფორსაჟი 9"- ის გადაღებები დაიწყო (ვიდეო)
ჰოლივუდური ბლოკბასტერის “ფორსაჟი 9”-ის ეპიზოდების გადაღება თბილისში დღეიდან დაიწყო.გადაკეტილია ვაჟა ფშაველას გამზირი, სადაც გადასაღები მოედანია მოწყობილი.ფილმის მთავარი მსახიობები საქართველოში არ ჩამოსულან, მათ მაგივრად კასკადიორები მუშაობენ.

გადაღებებისთვის საჭირო ტექნიკური საშუალებების აწყობა საგამოფენო ცენტრ Expo Georgia-ს ტერიტორიაზე მიმდინარეობს. საქართველოში გადაღებების წარმოებისათვის ბიუჯეტი 32 მილიონამდე ლარით არის განსაზღვრული.
გადაღებებისთვის ძირითადი ადგილები თბილისსა და რუსთავში განისაზღვრა. კერძოდ, გადაღება განხორციელდება რუსთაველისა და ვაჟა-ფშაველას გამზირებზე, თავისუფლების მოედანზე, პუშკინის, ბესარიონ ჟღენტის, ავთო ვარაზისა და უნივერსიტეტის ქუჩებზე, ასევე, რუსთავში ბაზრობის ტერიტორიაზე. 

„ფორსაჟი 9“-ის გადამღები ჯგუფი 600 ადამიანისგან შედგება, აქედან 425 ადგილობრივი პერსონალია. საქართველოში გადაღებებს ქართული საპროდუსერო კომპანია „ენკენი ფილმს ფფ9“ უზრუნველყოფს. ფილმის გადაღებები პარალელურად მიმდინარეობს აშშ-ში და ევროპის სხვადასხვა ქვეყანაში. კონტრაქტის სხვა დეტალები, რომელიც სააგენტოს „აწარმოე საქართველოში“ და Universal Pictures−ს შორისაა გაფორმებული, ჯერჯერობით არ საჯაროვდება. საქართველოში პირველი ჰოლივუდური ფილის გადაღება 20 სექტემბერს დასრულდება.

„ფორსაჟის“ გადაღებების გამო დედაქალაქის ცალკეულ ქუჩებზე საგზაო მოძრაობის სქემები შეიცვალა.

Print
ბოლო სიახლეები